ኣባል ምክልኻል ኢትዮጵያን ኣዛዚ ፍሉይ ሓይልታትን ኣብ ክልል ኣምሓራ ዝነበረ ጀነራል ተፈራ ማሞ፡ ሓይልታት ፋኖ ምስ ኤርትራ ይኹን ምስ ሓይልታት ትግራይ ዝኾነ ርክብ ከምዘይነበሮም ብምግላጽ፡
“ኣብዚ እዋን እኳ ርክብ እንተዘይብልና፡ ኣብ ቀጻሊ ግን ክንገብሮ ኢና” ክብል ኢትዮ ኒውስ ጠቒሱ። ጀነራል ተፈራ፡ ኣብ ኢትዮጵያ ዘሎ ስርዓት፡ ንኣምሓራ፡ ትግራይን ኤርትራን ዒላማ ብምግባር ኣንጻር ሰሜናውያን ይሰርሕ ከምዘሎ ይኸስስ።
መንግስቲ ኢትዮጵያ፡ ሓይልታት ፋኖ ምስ ኤርትራ ርክብ ከምዘለዎም ዝኸስስ እኳ እንተዀነ ጀነራል ተፈራ ነቲ ክሲ ይነጽጎ።
ቅድሚ ክልተ ሰሙን ኣቢሉ ሰራዊት ምክልኻል ኢትዮጵያ፡ ምስ ዶር ደብረጵየን ዝወገነ ጀነራል ምግበይ ሃይለ ወፍሪ ሓድነት ብዝብል ስርሒት ንሓይልታት ፋኖ ብምትሕብባር ኣብ ልዕሊ 35 መዓስከራት ሓይልታት ፈደራል መጥቃዕቲ ከምዘካየደን ከቢድ ክሳራ ወሪዱዎ ከምዝተመልሰን ገሊጹ ነይሩ።
ይኹን እምበር ጄነራል ምግበይ ነቲ ዝቐረበሉ ክሲ ምስ ኢትዮ ፎርም ብቐጥታ ኣብ ዝገበሮ ዝርርብ እቲ ክሲ ንፖለቲካዊ ዕላማ ዝተፈብረኸ መሰረት ዘይብሉ ፈጠራ ምዃኑ ገሊጹ ነይሩ።
ጀነራል ተፈራ፡ ብወገኑ እቲ ሓይልታት ምክልኻል ኣብ መንጎ ስርሒት ሓይልታት ፋኖን ጀነራል ምግበይ ሃይለን ተፈጢሩ ኣሎ ዝበሎ ናይ ሓድነት ስርሒት ሓቅነት የብሉን ክብል ነጹጉዎ።
ይኹን እምበር ጄነራል ተፈራ እቲ ብፋኖ ዝተኻየደ ስርሒት ዕዉት ምንባሩን ዘደንቕ ምዕባለታት ይገብር ምህላውን ሓቢሮም።
ሓይልታት ምክልኻል ኢትዮጵያ ካብ ክልል ዓፋርን ካልኦት ኣንፈታትን ናብ ክልል ኣምሓራ ተወሳኺ ሓይሊ ንምውፋር ኣብ ምንቅስቓስ ከምዝነበረ ኣብ ማሕበራዊ መራኸቢታት ተሓቢሩ ነይሩ።
ጀነራል ተፈራ ማሞ ንሓይልታት ምክልኻል ኢትዮጵያ ኣብ ገዲፉ ናብ ምንቅስቓስ ፋኖ ቅድሚ ምጽንባሩ ካብ ኢትዮጵያ ንከይወጽእ ኣብ ትሕቲ እገዳን ምክትታል ስለያን’ዩ ነይሩ። ኣብዚ እዋን ጄነራል ተፈራ ማሞ ኣብ ሓይልታት ፋኖ ወተሃደራዊ ኣማኻሪ ኰይኑ ይሰርሕ ምህላው ጸብጻባት ይሕብሩ።
ጀነራል ተፈራ ማሞ፡ ምስ ኤርትራ ርክብ ከምዝገብር ገሊጹ!
Political Analysis
