ብርጌድ ንሓመዱ ከምቲ ኣኽበርቲ ሕጊ ጀርመን ዝበሉዎ ናይ ብሓቂ ግብረ ሽበራዊ ድዩ?

ኣኽበርቲ ሕጊ ጀርመን፡ ንብርጌድ ንሓመዱ ከም ግብረ ሽበራዊ እኳ እንተገለጹዎ፡ እቲ ምንቅስቓስ ግን ናይ ብሓቂ ግብረ ሽበራዊ ድዩ ዝብል ሕቶ ኣብ ኤርትራውያን ተቓለስቲ ፍትሒ ኣዘራራቢ ኰይኑ ኣሎ።
ምንቅስቓስ ብርጌድ ንሓመዱ ብስግረ ዶብ ዓፈና ስርዓት ኢሳይያስ ዝተባርዐ ህዝባዊ ቁጠዐ መንእሰያት እዩ። እዚ ምንቅስቓስ እዚ እቲ ካብ ኤርትራ ብምረቓ ኢሳይያስ ዝተላእከ ኣወል ስዒድ፡ ኣብ ፌስቲቫል ጀርመን ነቶም ብግፍዒ መንግስቲ ኤርትራ፡ ኣብ ዶባት ሃገሮም ብጥይት እናተሳሕቱ፡ ኣብ ኣጻምእ ሰሃራን ማእከላይ ባሕርን ምስ ኬላታት ሞት ገጢሞም ናብ ሃገራት ምዕራብ ዝኣተው መንእሰይ ብኽሕደት ሃገር ምስ ወንጀሎም ዝተላዕለ ህዝባዊ ባርዕ መንእሰያት እዩ።
ሰብ መዚ ጸጥታ ጀርመን ካብ ሎሚ ረቡዕ ጀሚሮም ንመስረትቲ ‘ብርጌድ ንሓመዱ’ ኣብ ቀይዲ ንምእታው ስርሒት ምጅማሮም ዝፍለጥ ኰይኑ፡ ተጣበቕቲ ፍትሒ ኤርትራውያን ነቲ ሓቂ ንምርዳእ ተርኦም ክጻወቱ ደለይቲ ፍትሒ ጸዊዖም።
ኣኽበርቲ ሕጊ ጀርመን ኣብ ሽዱሽተ ዞባታት እታ ሃገር ነቶም ከም ጥርጡራት ዝሰመዮም ንምድላይ ተፍትሽ ይካየድ ምህላውን ምሕባሩ ከም ዘሕዘኖም ዝገለጹ ደለይቲ ፍትሒ እቲ ኣብ ዝሓለፈ ዓመታት ብቑጠዐ ዝተፈጸመ ጌጋታት ንምእራሙ ድሉዋት ምህላዎም ሓቢሮም።
ኣብዚ እዋን አዚ ኣብ ሃገራት ምዕራብ ጽልኢ ስደተኛታት ዘለዎም ሰልፍታት ኣብ ስልጣን ይመጽኡ ስለዘለው ኩሎም መንእሰያት ኣባላት ብርጌድ ንሓመዱ ቃልሶም ኣብ ክንዲ ጐነጽን ሓይልን ሕግታት እተን ዝነብሩለን ሃገራት ተረዲኦም ቃልሶም ብሰላማዊ ኣገባብ ከካይዱዎን ካብ ሕሉፍ ጉድለታቶም ክእረሙን ዘዘኻኸሩ ደለይቲ ፍትሒ ኩሉ ሕልናዊ ሓላፍነት ዘለዎ ተቓላሳይ ፍትሒ ኣብ ጐድኒ እቶም ሰበ ስልጣን ጀርመን ዝሃድኑዎም ዘለው ኣባላት ብርጌድ ንሓመዱ ደው ክብሉ ጸዊዖም።
ኣብ መስከረም 2024 ካብቶም ኣብ ጀርመንን ኣብ ሆላንድን ተቓውሞ ዝወደበ ከም ላዕለዋይ ሓላፊ እቲ ምንቅስቓስ ዝተገልጸ ሰብ ንዓመታት ክእሰር ብምፍራዱ ንመቓልስቱ ኣቐጢዑዎም እዩ።
ምንቅስቓስ ብርጌድ ንሓመዱ ነዚ ክውንነት እዚ ኣብ ግምት ብምእታው ነቲ ክጅምር እንከሎ ህግደፍ ኣብ ዝውድቦ ፌስቲቫላት ዝተፈላለያ ሃገራት ምስ ፖሊስን ኣካላት ሕግን እተን ሃገራት ዝገበሮ ጐንጺ ክእርሞ ጀሚሩ እዩ።
መብዛሕትኦም ኣባላት ናይቲ ምንቅስቓስ ካብቲ ኣብ ሃገሮም ዘሎ ግዱድን ገደብ-ኣልቦን ወተሃደራዊ ኣገልግሎት፡ ከምኡ’ውን ምግሃስ ሰባዊ መሰላት ሃዲሞም ኣብ ሃገራት ኣውሮጳን ካልኦት ሃገራትን ዑቕባ ዝሓተቱ’ዮም።
እታ ኣብ 1991 ካብ ኢትዮጵያ ምሉእ ናጽነታ ዝተጎናጸፈት ኤርትራ፡ ኣብ 1993 ብወግዒ ኣብ ሕቡራት ሃገራት ካብ እትምዝገብ ብዘይ ቅዋምን ምርጫን ንዝሓለፈ ልዕሊ 30 ዓመታት ብፕሪዚደንት ኢሳይያስ ኣፈወርቂ’ያ ትምራሕ ዘላ። ኣብ ኤርትራ ኣንጻር መንግስቲ ተቓውሞታት ምስማዕ ይኹን ተቓዋሚ ውድብ ምምስራት ፈጺሙ ስለዘይከኣል እየን ተቓወምቲ ሰልፈታትን ውድባትን ኣብ ስደት ዝንቀሳቐሳ ዘለዋ።