ኣብ ውግእ ሓድሕድ ሱዳን መርገጺኡ ምስ ጄነራል ቡርሃን ምዃኑ ዘነጸረ ፕረዚደንት ኢሳይያስ ነቲ ስርዓት ኣብ ዝተፈላለየ ወተሃደራዊ መዳያት ቴክኒካዊ ሓገዝ ከምዝገብረሉ ምንጭታት ሓቢሮም።
ኣብ ርእሲኡ እቶም ኣብ ውግእ ሓድሕድ ኢትዮጵያ ሃዲሞም ንሱዳን ዝኣተው’ሞ ኣብ ሱዳን ወተሃደራዊ ስልጠና ወሲዶም፡ ኣብ ኣቤ ደቡብ ሱዳን ከም ዓቀብቲ ሰላም ተመዲቦም ዝጸንሑ ኣብ መኰንናት ተወዲቦም ዝርከቡ ኣካል ቲዲኤፍ ትግራይ ምዃኖም ዝንገረሎም ሓይልታት እውን ንጄነራል ቡርሃን ብምድጋፍ ኣብቲ ውግእ ይሳተፉ ምህላዎም ይሕበር ኣሎ።
ኣብዚ እዋን እዚ ኣብ ምጅማር እቲ ውግእ ካብ ካርቱም ተደፊኡ ናብ ፖርት ሱዳን ግዒዙ ዝነበረ ብኣልቡርሃን ዝምራሕ መንግስቲ ብሓገዝ እዞም ዝጥቀሱ ዘለው ተዋጋእቲ ሓይልታት ንምልእቲ ካርቱም ናጻ ኣውጺኡ ንኣርኤስኤፍ ኣብ ኩሉ ቦታታት ንምስዓር ይስዕቦ ከምዘሎ ይፍለጥ።
ስርዓት ኣልበሽር ብህዝባዊ ተቓውሞ ድሕሪ ምዕላው ነዊሕ ኣብ ዘይኰነ ግዜ ኣብ መንጐ ሕሜቲን ኣልቡርሃንን ብዝተፈጥረ ናይ ስልጣን ቁርቁስ ብኩናት ሓድሕድ ትሕመስ ዘላ ሱዳን ዞባ ዓውደ ውግእ ናይ ግዳም ሓይልታት ምዃና እዩ ዝንገር ዘሎ።
ኣብቲ ውግእ ሕቡራት ኢሜራት ዓረብ ንሕሜቲ፡ ግብጽን ስዑድያን ከኣ ንጄኔራል ቡርሃን ክሕግዛ ከምዝጸንሓ እዩ ዝፍለጥ።
ኤርትራ፡ ንጄነራል ቡርሃን ወተሃደራዊ ሓገዝ ከምእትገብረሉ ተሓቢሩ!
Political Analysis
