ፕረዚደንት ግዝያዊ መንግስቲ ክልል ትግራይ ነበር ጌታቸው ረዳ ብዛዕባ ቁርቁስ ስልጣን ህወሓትን መጻኢ ዕድል ትግራይን ተዛሪቡ።
ኣብ ቀረባ እዋን ካብ ሓላፍነቱ ዝተኣልየ ግዝያዊ ፕረዚደንት ክልል ትግራይ ነበር ጌታቸው ረዳ፡ ካብ ዱባይ በርድ ምስ ዝተባህለ መርበብ ሓበሬታ፡ ኣብ ኤውሮጳን ወሽመጥ ዓረብን ኣብ ሲኤንኤን ኢንተርናሽናል፡ ንሮይተርስ፡ ቢቢሲን ፖሊቲኮን ዝጽብጽብ ጂም ስቴንማን ዝተባህለ ሽወደናዊ ኢትዮጵያዊ ጋዜጠኛ፡ ብዛዕባ እቲ ኣብ ትግራይተኸሲቱ ዘሎ ናይ ስልጣን ቁርቁስ ዘበገሶ ቅልውላው፡ ምስ መንግስቲ ኤርትራ ብጋህድን ምስጢርን ዝተገብረን ዝግበር ዘሎ ርክብን ንሱ ከስዕቦ ዝኽእል ሲናርዮን፡ ትግራይ ምስ ኤርትራን ፈደራላዊ መንግስትን ዘለዋ ዝምድናን ክምዕብል ዝኽእል ምዕባለታትን ብዝምልከት ሰፊሕ ቃለ መሕትት ኣካይዱ።
ጌታቸው ረዳ፡ ኣብ ህወሓት ዝተፈጥረ ቅልውላው ንውዕል ፕሪቶርያን ረብሓ ህዝቢ ትግራይን ኣብ ከቢድ ሓደጋ ከምዘውደቖ ተዛሪቡ። እቲ ብስቓይ ተጋሩ ዕድመኡ ከናውሕ ዝደሊ ናይ ህዝቢ ሓልዮት ዘይስመዖ ብስልጣን ዝቆራቖስ ዘሎ ዝበሎ መቐናቕንቱ ፖለቲካዊ ኤሊት፡ ነቲ ህይወት ኣማኢት ኣሽሓት ሰባት ዝቐዘፈ ኣዕናዊ ኲናት ዝፈጠሮ በሰላን ቁስልን ኣብ ክንዲ ምሕዋይ ንጻዕርታት ሰላም ብምዕንቃፍን ኣብ ስልጣን ይቆራቖስ ኣሎ ክብል ከሲሱ።
ኣብ መጋቢት 2025 ካብ ስልጣኑ ከምዝተኣልዩ ዝንገር ዘሎ ኣቶ ጌታቸው ኣብቲ ደበና ጥፍኣት ዘለንጸላልዎ ዘሎ ዞባ ዳግማይ ዘይምርግጋእ ከይህሉ ስግኣት ከምዘለዎ ሓቢሩ።
ምስ መንግስቲ ኤርትራ ፈላሚ ርክብ ከምዘካየደ ዝሓበረ ኣቶ ጌታቸው ፕረዚደንት ኢሳይያስን ኣቢይን ንሓይልታት ትግራይ ኣብ ጐድኖም ብምስላፍ ነንረብሐኦም ክጥቀምሉ ከምዝደልዩ ሓቢሩ።
ብጉዳይ ጥዕና ኣብ ዱባይ ሕክምና ዝገብር ዘሎ ጌታቸው ረዳ። ዋላ እውን ኣብ መገሽኡ እንከሎ ምምሕዳራዊ ስራሕ ግዝያዊ መንግስቲ ክልል ትግራይ ይፍጽም ከምዘሎን፡ ዋላ እኳ ጸጥታዊ ስክፍታታት እንተለዎ ናብ ኢትዮጵያ ክምለስ መደብ ከምዘለዎም ገሊጹ።
ጌታቸው ኣብ ክንዲ ምስ መሳርሐቱ ተጋሩን ህዝቢ ትግራይን ምስ ፈደራላዊ መንግስቲ ወጊኑ ክብሉ ንዝኸሱዎ መቐናቕንቱ “ ምስሉይነት’ዩ!” ክብል ብምንጻግ ካብኡ ንላዕሊ ብቐጻሊ ምስ ኣቢይ ይራኸቡ ከምዝነበሩን ከምዘለውን ሓቢሩ።
ጌታቸው ኣብ ህወሓት ዝርከቡ ባእታታት ምስ ሰበ-ስልጣን ኤርትራ ምትሕብባር ከምዝጀመሩን እቲ ዝምድናን ጽግዕን ንህዝቢ ትግራይ ኰነ ነቲ ዞባ ካልእ ሓደጋ ከየስዕበሉ ስግኣት ከምዘለዎ እውን ኣስሚሩሉ።
ንዝምድና ስዑድን ኤርትራን ብጉዳይ ዓሰብ ብዝምልከት ከኣ ኣቶ ጌታቸው ኢሳይያስ ኣፈወርቂ ናይ ጸጥታ ስግኣት እንተተሰሚዑዎ ምስ ስዑዲ ዓረብ ኮነ ካልኦት ሓይልታት የዋጽኣኒ እዩ ዝብሎ ስጉምቲ ክወስድ ድሕር ከምዘይብል ሓቢሩ።
ኣብ መወዳእታ ኣቶ ጌታቸው ኣብ መሪሕነት ህወሓት ንቕድሚት ዝጥምት ናይ ሓዲሽ መሪሕነት ክፍጠርን፤ መንእሰያት ንትግራይ ናብ ዝሓሸን ዝበረኸን መድረኽ ከስግሩዋን ተማሕጺኑ።
