ህዝቢ ትግራይ ግዝያዊ ፕረሲደንት ክመርጽ ዘኽእል ዕድላትን መሳለጥያን ኣለዎ ድዩ?

ኣቢይ ኣሕመድ ህዝቢ ትግራይ ንዓመት ዘገልግል ግዝያዊ ፕረዚደንት ትግራይ ዝኸውን ክረቁሕ ምርቋሕ ብትግርኛ ኣብ ኤክስ መልእኽቲ ድሕሪ ምምሕልላፉ ዝተፈላለየ ርእይቶታት ይስማዕ ኣሎ።
ህዝቢ ትግራይ ብዝተማልአ መንገዲ ብምርጫ መራሕቱ ክሳዕ ዝመርጽ ናይ ህዝቢ ተሳትፎ ንምርግጋጽ ብኢንተርነት ሕጹይ ክመርጽ ኣገዳሲ እዩ ዝተባህለ ሓበሬታ ብገለ ወገናት ተጋሩ፡ እቲ ሓሳብ ኢንተርነት ክጥቀም ንዘይክእል ዝዓበየ ክፋል ሓረስታይ ህዝቢ ስለዘየሳትፍ ንፖለቲካዊ ሃልኪ እንተዘይኰይኑ ግብራውን ፍትሓውን ኣይኰነን ክብሉ ይነቕፉዎ።
ኣብዚ እዋን’ዚ ኣብ ህወሓት ብዝተፈጥረ ምምቕቓል ኣብ ትግራይ ፖለተካዊ ወጥሪ ሰፊኑ’ሎ። እቲ ብዶ ደብረጽዮን ዝምራሕ ክንፊ ብዕጡቓት ተሓጊዙ፡ ኣብያተ ጽሕፈት ከባብያዊ ምምሕዳራት’ቲ ክልል ድሕሪ ምቁጽጻሩ ኣብታ ክልል ግጭትን ውግእን ከይስዕብ ኣብ ብዙሓት ስግኣት ሓዲሩ ምህላው ይፍለጥ።
ቀዳማይ ምኒስተር ኣቢይ ነቲ ብውዕል ፕሪቶርያ ዝቘመ፡ ብፕረዚደንት ጌታቸው ረዳ ክምራሕ ዝጸንሐ ግዝያዊ ምምሕዳር ትግራይ፡ ኣብ ዝሓለፉ ክልተ ዓመታት ንዝገበሮ ኣበርክቶ ብምድናቕ ግዝያዊ ምምሕዳር፡ ምምሕያሻት ሕጊ ከም ዘድልዮን ኣብ መሪሕነት መጠናዊ ለውጢ ከም ዝግበርን’ውን ሓቢሩ ነይሩ።
ይኹን እምበር እቲ ቀዳማይ ምኒስተር ፡ ኣብቲ ሎሚ ዘውፀኦ ፅሑፍ ሓላፍነት ኣቶ ጌታቸው ረዳ ዘብቅዐ ይመስል።
ኣቢይ ኣሕመድ “ንዕማማት ግዝያዊ ምምሕዳር ብብቕዓት ክፍጽሙን፡ ሰላምን ድሕንነትን እቲ ክልል ከራጋግጹ ይኽእሉ እዮም ኣትብልዎም ሕጹያት፡ ናብ ቤት ጽሕፈት ቀደማይ ምኒስተር ኢሜል አድራሻ (info@pmo.gov.et) ክትልእኩ ንጽውዕ፡” ክብል ዘውጸኦ፡ ዕድመን ጾታን እቲ ሕጹይን ካበየናይ ክልል የድምጽ ኣሎ እውን ስለዘየመልክት ትርጉም የብሉን ክብሉ ዝነቕፉዎ ኣለው።
ብኻልእ ወገን ከኣ ምስ ኣብ ትግራይ ተኸሱቱ ዘሎ ወጥሪ፡ ዋላ እውን ድሩትነት ይሃልዎ ህዝቢ መራሕቱ ክመርጽ ምፍቃድ ልቦና እዩ ብምባል ዝድግፉውዎ እውን ኣለው።
ሕግታት ሕገ-መንግስትን ንዕኡ መሰረት ገይሮም ዝወጽኡ ደንብታት፡ “ግዝያዊ ምምሕዳር ትግራይ ኣብ ውሽጢ ክልተ ዓመት ናይ ግዝያዊ ምምሕዳር ዕማማቱ አጻፊፉ ሓላፍነቱ ብህዝቢ ንዝተመርጸ መንግስቲ ከረክብ እዪ ዝግባእ ነይሩ፡”።
ይኹን እምበር ግዝያዊ ምምሕዳር ትግራይ ዝተዋህቦ ቀንዲ ዕማማት ኣብ ዝተወሰነሉ ግዜ ከጻፍፍ ስለዘይከኣለ እዩ ዕድሚኡ ብዓመት ዝናዋሕ ዘሎ።