መዓርፎ ነፈርቲ ብሪጣንያ፡ “ሂትሮ!” ኣብ ከባቢኡ ብዝተፈጥረ ባርዕ ሓዊ በረራ ኣቋሪጹ ውዒሉ!

ኣብ ምዕራብ ለንደን ዝርከብ ዝዓበየ መዓርፎ ነፈርቲ ሂትሮ ብሰንኪ እቲ ኣብ ከባቢኡ ዘጋጠመ ባርዕ፡ ሓይሊ ኤለትሪክ ስለዘቋረጸ 1300 በረራታት ብምስራዙ ኣብ መላእ ዓለም ናይ ገያሾ ምምዝባል ተፈጢሩ ውዒሉ።
ሰራሕተኛታት መጥፋእቲ ሓው ነቲ ኣብ ባርዕ ንምቁጽጻር ክረባረቡ ውዒሎም ሕጂ ኣብ ትሕቲ ቁጽጽር አእትዮምዎ ኣለው። ሂትሮ ንኣገዳሲ ውሽጣዊ ስርሓቱ ዘሰላስለሉ ዘካይደሉ መሐለውታ ሓይሊ ኤለትሪክ እኳ እንተለዎ ንብምልኡ ንጥፈታቱ ከተግብር ዘኽእል ኣይኮነን። ሃገራዊ ሓይሊ ኤለትሪክ እውን ድሮ ግዝያዊ መፍትሒ ስለዝገበረ ኣማስይኡ ሓደ ሓደ በረራታት ከምዝጀመረን ጽባሕ ናብ ንቡር ስርሑ ክምለስ ተኽእሎ ከምዘሎ እቲ ትካል ሓቢሩ።
መዓርፎ ነፈርቲ ሂትሮ፡ ሓደ ካብቶም ኣብ ዓለምና ዝበዝሑ ተሳፈርቲ ዝንቀሳቐሱሎም መዓርፎ ነፈርቲ ኰይኑ መዓልቲ ልዕሊ 1,300 በረራታት ብምክያድ፡ ንኣስታት 219,000 ገያሾ የገልግል። ኣብ ዓመት ድማ፡ ልዕሊ 480,000 በረራታት ብምክያድ፡ ክሳብ 80 ሚልዮን ተሳፈርቲ የአንግድ።
ንሂትሮ፡ ናብ ኣስታት 180 ቦታታት በረራታት ዘካይ ልዕሊ 80 መስመራት ኣየር ይጥቀማሉ። ይኹን እምበር፡ መዓርፎ ነፈርቲ ሂትሮ ብዙሓት ገያሾን ተጠቀምትን ስለዘለውዎ ዓቕሙ ንምስፋሕን ኣገልግሎቱ ንምምሕያሽን ቀጻሊ ጻዕርታት ዘካይድ ዘሎ ኣብ ብሪጣንያ ዓቢ ቁጠባዊ ኣበርክቶ ዘለዎ መዓርፎ ነፈርቲ እዩ።
እቲ ባርዕ ብኸመይ ከምዘጋጠመ መጽናዕቲ ዘካይዱ ዘለዎ ፖሊስን ዝምልከቶም ኣካላት ጸረ ሽበራን እቲ ጉዳይ ምስ ሽበራ ዝተኣሳሰር ምልክት ከምዘይብሉ ሓቢሮም።