መንግስቲ ኤርትራ፡ ማሕበረሰብ ዓለም ንኢትዮጵያ ጸቕጢ ክገብረላ ኣዘኻኺሩ!

ሚኒስተር ጉዳያት ወጻኢ ኤርትራ ዑስማን ሳልሕ፡ ሎሚ ኣብ ኤርትራ ንዝርከቡ ቀወምቲ ኣምባሳደራትን ዲፕሎማሰኛታትን፡ ኤርትራ ኣብ ልዕሊ ኢትዮጵያ ሓድሽ ኲናት ክትከፍት’ያ ዝብል ብኢትዮጵያ ዝቐርብ ዘሎ ክሲ መሰረት ከምዘይብሉን ከምዝነጽጎን ሓቢሩ።
ድሕሪ ስምምዕ ፕሪቶርያ ኣብ መንጐ ክልቲአን ሃገራት ዝነበረ ርክብ ምስ ሻሕከሩ ቀዳማይ ምኒስተር ኣቢይ ኣሕመድ፡ ኢትዮጵያ ብታሪኽ፡ ጂኦግራፊ፡ ደሞግራፍን ቁጠባን ናይ ባሕሪ ዋንነት ከምዝግበኣ ኣብ ባይቶ ሃገሩ ብወግዒ ምስተዛረበን ጀነራላቱን ፖለቲከኛታቱን ምስ ደጋግምዎ እቲ ናይ ውግእ ወረ ክናፈስ ጀሚሩ።
ብድሕሪኡ እውን ጀኔራል ጻድቃን፡ ኤርትራ ንኵናት ትዳሎ ብምህላዋ “ውዒሉ ሓዲረ ኣብ መንጐ እዘን ክልተ ሃገራት ውግእ ኣይተርፍን እዩ!|” ክብል ድሕሪ ምጽሓፉ፡ ሚኒስተር ዜና የማነ ገብረመስቀል፡ ንጽሑፍ ጀኔራል ጻድቃን ብምንጻግ፡ “መንግስቲ ኤርትራ ንውሽጣዊ ግጭት ህወሓት ንምግዳድ ድላይ የብሉን” ክብል መርገጺ ሃገሩ ኣነጺሩ ነይሩ።
ኣብዚ ቀረባ መዓልታት፡ ፕረዚደንት ግዝያዊ ምምሕዳር ኮይኑ ከገልግል ዝጸንሐ ኣቶ ጌታቸው ረዳ፡ ንገለ ካብቶም ዝቃወምዎ ኣዘዝቲ ሓይልታት ትግራይን መራሕቲ ህወሓትን፡ “ ምስ ኤርትራ ርክብ ይገብሩ ኣለዉ!” ክብል ብምኽሳስ ኣብ ኢትዮጵያ ንዝርከቡ ዲፕሎማት መብርሂ ሂቡ ነይሩ። ሓደ ሓደ ሰብ መዚ ፈደራላዊ መንግስቲ ኢትዮጵያ’ውን ነቲ ዝተባህለ ርክባት “ጥዕና ዘይብሉ’የዑ” ክብሉ ገሊጾሞ ነይሮም።
ኤርትራ፡ ካብ ጐረባብታ ንዘጋጥማ ንልዑላውነታ ዝደፍር ናይ ቃላትን ተግባርን ግህሰታት ናብ ማሕበረ ሰብ ዓለም ብወግዒ ስምዕታ ከተቕርብ እዚ ናይ ፈለማ ተበግሶ ምዃኑ ተንተንቲ ፖለቲካ ይገልጹ።
ኣብዚ እዋን ኣብ ትግራይ ዝለዓለ ስልጣን ግዝያዊ ምምሕዳር ከምዝተቖጻጸረ ዝንገረሉ ዘሎ ኣዛዚ ሓይልታት ትግራይ ጀነራል ታደሰ ወረደ፡ ብወገን ላዕለዎት ኣዘዝቲ ምስ ኣስመራ ዝካየድ ርክብ ከምዘየለ ቅድሚ ክልተ መዓልታት ኣብ ዝሃቦ ጋዜጣዊ መግለጺ ተዛሪቡ ነይሩ።
እንተኾነ ግን ኣብ ከባቢ ዶባት ዘለዉ ታሕተዎት ሰብ መዚ ኣብቶም ከባቢታት ምርግጋእ ንምውሓስ ዘይስሩዕ ርክባት ከምዝግበር ብምጥቃስ ውሱን ሰላማዊ ርክብ ህዝብታት ክልቲኡ ሃገራት ከምዘሎ ተዛሪቡ።
ዶ/ር ደብጽዮን ገብረሚካኤል እውን ምስ ኤርትራ “ሕቡእ” ርክብ ከምዘየለ ገሊጹ ነይሩ።
ኤርትራ ነቲ ብወገን ኣዲስ ኣበባ ዝቃላሕ ዘሎ “ብዲፕሎማሲ ይኹን ብወተሃደራዊ ሓይሊ” ኣፍደገ ባሕሪን መዓስከር ሓይሊ ባሕርን ናይ ምርካብ “ግጉይ” ሸውሃት ከምዘቖጥዓ ብምግላጽ፡ ማሕበረሰብ ዓለም ነዛ ልዑላዊ ግዝኣት ክትግህስ እትደናደን ዘላ ኢትዮጵያ፡ ልኡላውነትን ግዝኣታዊ ሓድነትን ጎረባብታ ከተኽብር ጸቕጢ ክገብሩላ ትምሕጸን።
ሚኒስተር ዑስማን ሰራዊት ሃገሩ ካብ ዶባቱ ከምዘይሰገረ ብምግላጽ ኤርትራ፡ መስርሕ ስምምዕ ሰላም ፕሪቶርያ ከተእቱ ድላይ ከምዘይብላ ደጊሙ ኣረጋጊጹ።